#食勻佐敦「榮式燒雞扒」係我成日去嘅餐廳，因為我本身好鐘意食雞蛋，所以幾乎每次都係叫“親子飯”即係雞扒蛋飯，加多杯凍檸茶走甜。
佢嘅雞扒一定要推介，因為一般茶餐廳嘅雞扒多數整塊都好乾身，靠嘅都係配汁－－但榮記嘅雞扒唔同，表面脆身，內裡Juicy，加上用左黑胡椒，咬落去香得嚟，又帶D胡辣。
外觀上見到雞皮煎到金黃色，感覺脆脆地好吸引，但因為我一向做開運動，唔想吸收太多脂肪 (因為生活所迫，我一日三餐都要出街食)，所以習慣切走雞皮再食，盡量健康D。
另外飯配左蔥油，感覺更香口，但我好多次都忍住自己嘅嘴，叫自己唔好放縱自己，因為蔥油飯真係好邪惡（每100克蔥油所含熱量約為900卡，即係大概要跑112分鐘步先可以消耗）。
可能您睇到呢度，有D想打我的衝動，因為見到我介紹得點好點好，但又叫大家冇食呢D冇食果D，請停一停，諗一諗，如果您冇辦法之下，而又要經常外出食飯的話，有智慧地選擇進食都係好重要，俗語都有話：「病從口入，禍從口出」～
希望大家食得健康又開心啦～！
－－－－－－－－－－－－
榮式燒雞扒 佐敦吳松街139號
by健生太郎
Search